“Festivali Kulturor Shqipëri–Izrael” është një festival i përvitshëm i artit dhe kulturës, që prezanton dhe promovon krijimitarinë bashkohore dhe trashëgiminë kulturore të Izraelit dhe Shqipërisë, dhe më gjerësisht mes diasporave shqiptare dhe hebreje në botë. Edicioni i ardhshëm 2022 do të mbledhë së bashku në Tiranë artistë, autorë e krijues dhe operatorë kulturorë nga Izraeli, Shqipëria dhe skena ndërkombëtare e artit dhe kulturës, si pjesë e një programi eventesh dhe performancash të cilat përfshijnë muzikën instrumentale klasike dhe jazz, muzikën tradicionale popullore nga Shqipëria dhe Izraeli, baletin klasik, kërcimin kontemporan, art innovation, chess n’ jazz, artet vizuale, artet murale, letërsinë dhe publicistikën, artet kulinare edhe kinematografinë.
“Festivali Kulturor Shqipëri–Izrael” sjell në Shqipëri dhe rajonin e Ballkanit një brand të ri të ekselencës artistike dhe të projekteve inovative shumë-disiplinore. Përmes mbështetjes dhe pjesëmarrjes në projekte në fushën e artit dhe kulturës, Festivali gjithashtu synon të promovojë krijimtarinë bashkohore dhe trashëgiminë kulturore shqiptare dhe atë hebreje edhe në kontekstin më të gjerë Europian dhe ndërkombëtar. Shpëtimi i hebrenjve në Shqipëri gjatë Holokaustit përbën një vlerë të patjetërsueshme dhe aq të çmuar për kultivimin e dialogut ndër-breznor dhe ndër-kulturor për sfidat e aktualitetit që lidhet me racizmin, ksenofobinë, anti-Semitizmin dhe të gjitha format e intolerancës.